जयदीप जोगेंद्र कवाडे यांची खामगावमध्ये तेजेन्द्रसिंह चौहान यांच्या घरी भेट – चौहान कुटुंबियांचे सांत्वन, राजकीय चर्चा
खामगाव (जनोपचार न्यूज नेटवर्क) –महाराष्ट्र राज्य लघुउद्योग विकास महामंडळाचे उपाध्यक्ष तसेच आरपीआय (कवाडे गट) चे महाराष्ट्र कार्याध्यक्ष श्री. जयदीप जोगेंद्र कवाडे यांनी नुकतीच खामगाव तालुका काँग्रेस अध्यक्ष तेजेन्द्रसिंह चौहान यांच्या निवासस्थानी भेट दिली.
ही भेट तेजेन्द्रसिंह चौहान यांचे वडील, किशोरसिंह चौहान यांच्या निधनानंतर त्यांचे सांत्वन करण्यासाठी आयोजित करण्यात आली होती. जयदीप कवाडे यांनी चौहान कुटुंबीयांची भेट घेऊन त्यांना धीर दिला व दिवंगत आत्म्याच्या शांतीसाठी प्रार्थना केली.या प्रसंगी जयदीप कवाडे म्हणाले, "किशोरसिंहजी हे खामगावच्या सामाजिक व राजकीय क्षेत्रातील आदरणीय व्यक्तिमत्त्व होते. त्यांच्या जाण्याने एक मोठी पोकळी निर्माण झाली आहे. संपूर्ण चौहान कुटुंबाच्या दुःखात आम्ही सहभागी आहोत."
या भेटीदरम्यान दोन्ही नेत्यांमध्ये खामगाव विधानसभा क्षेत्रातील राजकीय घडामोडी, स्थानिक विकासाचे मुद्दे, मतदारांचे प्रश्न, तसेच आगामी राजकीय रणनीती यावरही चर्चा झाल्याची माहिती सूत्रांनी दिली.विशेष म्हणजे, आरपीआय (कवाडे गट) आणि काँग्रेस पक्ष यांच्यातील राजकीय समन्वय व भविष्यातील सहकार्याबाबत अनौपचारिक चर्चा झाल्याची शक्यता वर्तवली जात आहे.या भेटीने स्थानिक राजकारणात उत्सुकता निर्माण झाली आहे. दोन्ही नेत्यांचे समर्थक तसेच पक्षांचे कार्यकर्ते या घडामोडीकडे लक्ष ठेवून आहेत. पुढील काळात या भेटीचा राजकीय संदर्भात काही परिणाम होतो का, हे पाहणे महत्त्वाचे ठरेल.
Post a Comment